பெங்களூரில் IPL 2026 இறுதிப் போட்டி நடப்பதில் சந்தேகம் !?
2026 ஆம் ஆண்டுக்கான ஐபிஎல் கிரிக்கெட் தொடரின் Play off மற்றும் இறுதிப் போட்டி நடைபெறும் இடங்களை இந்திய கிரிக்கெட் கட்டுப்பாட்டு வாரியம் (BCCI) விரைவில் அறிவிக்க உள்ளது. இருப்பினும், இறுதிப் போட்டி பெங்களூரில் நடைபெறுமா என்பதில் தொடர்ந்து நிச்சயமற்ற நிலை நிலவி வருகிறது.
வழக்கமாக IPL விதிமுறைகளின்படி, நடப்பு சாம்பியனின் சொந்த மைதானத்தில் தான் இறுதிப் போட்டி நடைபெறும். (கடந்த முறை RCB சாம்பியன் பட்டம் வென்றது). ஆனால், பெங்களூரில் எழுந்துள்ள அரசியல் பிரச்சனைகள், குறிப்பாக எம்.எல்.ஏ-க்களுக்கான டிக்கெட் ஒதுக்கீடு தொடர்பான கோரிக்கைகள், இந்தப் பிரம்மாண்டமான இறுதிப் போட்டியை நடத்துவதில் சிக்கல்களை ஏற்படுத்தியுள்ளன என பிசிசிஐ வட்டாரங்கள் தெரிவிக்கின்றன.
இதுகுறித்து பிசிசிஐ வட்டாரங்கள் கூறுகையில், "IPL 2026 Play Off மற்றும் இறுதிப் போட்டி நடைபெறும் இடங்கள் விரைவில் அறிவிக்கப்படும். போட்டிகள் பஞ்சாப் மற்றும் கர்நாடகா மாநிலங்களுக்கு இடையே பிரிக்கப்பட வாய்ப்புள்ளது. வழக்கப்படி, நடப்பு சாம்பியன்கள் இறுதிப் போட்டியை நடத்த வேண்டும், ஆனால் எம்.எல்.ஏ டிக்கெட் பிரச்சனை பெங்களூரில் சிக்கலை ஏற்படுத்துகிறது. இதற்குத் தீர்வு கிடைக்காவிட்டால், பிசிசிஐ இறுதிப் போட்டியை வேறு நகரத்திற்கு மாற்றும்," என்று ANI செய்தி நிறுவனத்திற்குத் தெரிவிக்கப்பட்டுள்ளது.
டிக்கெட் சர்ச்சை பின்னணி:
நடப்பு ஐபிஎல் தொடரின் தொடக்க ஆட்டத்திற்கு முன்னதாக, காங்கிரஸ் எம்.எல்.ஏ விஜயானந்த் காஷப்பனவர், தேர்ந்தெடுக்கப்பட்ட பிரதிநிதிகள் "விஐபி"-க்கள் என்றும், அவர்கள் வரிசையில் நிற்க வேண்டிய அவசியமில்லை என்றும் கூறினார். மேலும், ஒவ்வொரு எம்.எல்.ஏ-வுக்கும் குறைந்தது ஐந்து ஐபிஎல் டிக்கெட்டுகள் வழங்கப்பட வேண்டும் என்று அவர் வலியுறுத்தினார்.
இந்தக் கருத்தைத் தொடர்ந்து, கர்நாடக துணை முதல்வர் டி.கே.சிவகுமார், தற்போதைய ஐபிஎல் தொடரில் RCB போட்டிகளுக்கான மூன்று டிக்கெட்டுகள் எம்.எல்.ஏ-க்கள் மற்றும் எம்.பி-க்களுக்கு வழங்கப்படும் என்று அறிவித்தார்.
இருப்பினும், கர்நாடக உள்துறை அமைச்சர் ஜி.பரமேஸ்வரா, கர்நாடக எம்.எல்.ஏ-க்கள் ஐபிஎல் போட்டி டிக்கெட்டுகளை தவறாகப் பயன்படுத்துகிறார்கள் என்ற குற்றச்சாட்டை மறுத்தார். டிக்கெட்டுகள் ஆன்லைனில் முன்பதிவு செய்யப்படுகின்றன என்றும், அவற்றை வாங்குபவர்கள் மட்டுமே பயன்படுத்துகிறார்கள் என்றும் அவர் விளக்கினார்.
எம்.எல்.ஏ-க்கள் அல்லது அவர்களது குடும்ப உறுப்பினர்கள் மட்டுமே பெங்களூரில் உள்ள எம். சின்னசாமி மைதானத்தில் நடைபெறும் ஐபிஎல் போட்டிகளில் கலந்துகொள்ள முடியும் என்றும், டிக்கெட்டுகள் "மாற்ற முடியாதவை" (non-transferable) என்று தெளிவாகக் குறிப்பிடப்பட்டுள்ளதால் மற்றவர்கள் பயன்படுத்த முடியாது என்றும் அவர் மேலும் தெரிவித்தார்.
விறுவிறுப்பான கட்டத்தில் புள்ளிப் பட்டியல்:
மே 5 ஆம் தேதி நிலவரப்படி, IPL 2026 புள்ளிப் பட்டியல் மிகவும் விறுவிறுப்பான கட்டத்தை எட்டியுள்ளது. பல அணிகள் இன்னும் Play Off சுற்றுக்குத் தகுதி பெறப் போராடி வருகின்றன.
பஞ்சாப் கிங்ஸ் அணி 9 போட்டிகளில் 13 புள்ளிகளுடன் முதலிடத்தில் உள்ளது.
ரோயல் சேலஞ்சர்ஸ் பெங்களூரு, சன்ரைசர்ஸ் ஹைதராபாத், ராஜஸ்தான் ரோயல்ஸ் மற்றும் குஜராத் டைட்டன்ஸ் ஆகிய நான்கு அணிகளும் தலா 12 புள்ளிகளுடன் அடுத்தடுத்த இடங்களில் உள்ளன. (சிறந்த ரன் ரேட் அடிப்படையில் RCB முன்னிலையில் உள்ளது).
சென்னை சூப்பர் கிங்ஸ் 10 புள்ளிகளோடும் டெல்லி கபிடல்ஸ் 8 புள்ளிகளுடனும் Play Off கனவைத் தக்கவைத்துள்ளன.
மும்பை இந்தியன்ஸ் (6 புள்ளிகள்) மற்றும் லக்னோ சூப்பர் ஜெயண்ட்ஸ் (4 புள்ளிகள்) புள்ளிப் பட்டியலில் கடைசி இடங்களில் உள்ளன. லக்னோ அணியின் வாய்ப்பு கிட்டத்தட்ட முடிவுக்கு வந்துவிட்டது.
பெங்களூரில் அரசியல் பதற்றம் தணியாத பட்சத்தில், கிரிக்கெட் ரசிகர்கள் ஆவலோடு எதிர்பார்க்கும் ஐபிஎல் இறுதிப் போட்டி வேறு ஒரு நகரத்திற்கு மாற்றப்படும் என்பது உறுதி.
0 கருத்துகள்