தென்னாப்பிரிக்கா இனி Chokers அல்ல: லோர்ட்ஸில் எழுதப்பட்ட புதிய அத்தியாயம்! #WTCFinal

 தென்னாப்பிரிக்கா இனி Chokers - 'சோக்கர்கள்' அல்ல: லோர்ட்ஸில் எழுதப்பட்ட புதிய அத்தியாயம்! #WTCFinal

லோர்ட்ஸ், லண்டன்: கடந்த 27 ஆண்டுகால கிரிக்கெட் உலகின் பெரும் பாரம், இன்று லோர்ட்ஸ் மைதானத்தில் தென்னாப்பிரிக்காவின் தோள்களிலிருந்து இறக்கி வைக்கப்பட்டது! ஆஸ்திரேலியாவை வீழ்த்தி, ஐசிசி உலக டெஸ்ட் சாம்பியன்ஷிப் 2025 கிண்ணத்தை வென்றதன் மூலம், நீண்டகாலமாக அவர்கள் சுமந்த 'சோக்கர்கள்' என்ற அவப்பெயரை துடைத்தெறிந்து, வரலாற்றில் ஒரு புதிய அத்தியாயத்தை தென்னாப்பிரிக்கா எழுதியுள்ளது.

மார்க்ரம் - பவுமாவின் காவியத் துரத்தல்: கனவு மெய்பட்டது!

பல ஆண்டுகளாக, முக்கியப் போட்டித் தொடர்களில் சிறப்பாகச் செயல்பட்டும், இறுதி வெற்றியைப் பெற முடியாமல் தடுமாறியது தென்னாப்பிரிக்கா. ஒவ்வொரு தோல்வியும், அணியின் மீது ஒரு பெரும் சுமையாகவே இருந்தது. ஆனால், இன்று நிலைமை தலைகீழாக மாறியது! எய்டன் மார்க்ரமின் கம்பீரமான 136 ஓட்டங்கள் மற்றும் தலைவர் டெம்பா பவுமாவின் உறுதியான 65 ஓட்டங்கள் (ஆட்டமிழக்காமல்), லோர்ட்ஸில் 282 ஓட்டங்கள் என்ற சவாலான இலக்கைத் துரத்தி, ஒரு வரலாற்றுச் சிறப்புமிக்க வெற்றியை உறுதி செய்தது. இது 1998 சாம்பியன்ஸ் கிண்ணத்துக்குப் பிறகு தென்னாப்பிரிக்கா வென்ற முதல் ஐசிசி கோப்பையாகும்.

வெற்றிக்குப் பிறகு பேசிய தலைவர் டெம்பா பவுமா, "நாங்கள் துடுப்பாடிக் கொண்டிருந்தபோது, ஆஸ்திரேலியர்கள் 'சோக்கர்கள்' (chokers) என்ற அந்த மோசமான வார்த்தையைப் பயன்படுத்தியதை எங்களால் கேட்க முடிந்தது. நாங்கள் மிகுந்த நம்பிக்கையுடன் இறுதிப் போட்டிக்கு வந்தோம், ஆனால் அதே நேரத்தில் பல சந்தேகங்களுடனும் வந்தோம். இந்த நிலையை நாங்கள் எப்படி அடைந்தோம் என்பது கூட கேள்விக்குள்ளாக்கப்பட்டது. இந்த வெற்றி அத்தனை சந்தேகங்களுக்கும் முற்றுப்புள்ளி வைத்துவிட்டது. பிளவுபட்டுக் கிடக்கும் ஒரு தேசமாக, ஒன்றாக இணைவதற்கான ஒரு தருணத்தை இந்த வெற்றி எங்களுக்கு அளிக்கிறது" என்று உணர்வுபூர்வமாகத் தெரிவித்தார்.

கடந்தகாலத் தோல்விகளுக்குப் பழிவாங்கல்: புதிய நம்பிக்கை!

தென்னாப்பிரிக்காவின் அண்மைய வலிமிகுந்த தோல்வி 2024 T20 உலகக் கிண்ண இறுதிப் போட்டியில் இந்தியாவிடம் வெற்றி வாய்ப்பை இழந்ததுதான். ஆனால், லோர்ட்ஸில் பெற்ற இந்த வெற்றி, 1999 உலகக் கிண்ண அரையிறுதியில் ஆஸ்திரேலியாவிடம் இங்கிலாந்து மண்ணில் சந்தித்த இதயத்தை நொறுக்கும் தோல்விக்குப் பழிவாங்குதலாக அமைந்தது.

"ஒரு நாடாக, இது நேர்மறையான ஒன்றைக் கொண்டாடுவதற்கான, எங்கள் பிரச்சினைகளை ஒதுக்கி வைத்துவிட்டு ஒன்றுபடுவதற்கான ஒரு வாய்ப்பு. இந்தச் சாதனை தொடர்ந்து அனைவருக்கும் உத்வேகம் அளிக்கும் என்று நம்புகிறேன். இந்த வீரர்கள் குழுவை பலர் சந்தேகித்தனர், ஆனால் நாங்கள் செயல்பட்ட விதம் அந்த சந்தேகங்கள் அனைத்தையும் நீக்கிவிட்டது" என்று தென்னாப்பிரிக்கா தலைவர் மேலும் கூறினார்.

ஆட்ட நாயகன் விருது வென்ற மார்க்ரம், பவுமாவின் கருத்துக்களுடன் உடன்பட்டார். "அந்தக் குரல்களை இறுதியாக அமைதிப்படுத்தியது அற்புதமான உணர்வைத் தருகிறது. அந்த அவப்பெயரைத் தாண்டி, வேலையை முடிப்பது எங்களுக்கு ஒரு பெரிய மைல்கல். முன்பு எழுப்பப்பட்ட ஒவ்வொரு கேள்விக்கும் இப்போது பதிலளிக்கப்பட்டுவிட்டது" என்று மார்க்ரம் குறிப்பிட்டார்.

இந்த வெற்றி, தென்னாப்பிரிக்க கிரிக்கெட் வரலாற்றில் ஒரு புதிய அத்தியாயத்தைத் திறந்துள்ளதுடன், 'சோக்கர்கள்' என்ற அவப்பெயரை நீக்கி, ஒரு போராடும், வெற்றிபெறும் அணியாகத் தங்களை நிரூபித்துள்ளனர்.

#SouthAfrica #WTCFinal #CricketChampions #AidenMarkram #TembaBavuma