டெம்பா பவுமாவின் சாதனை ! #WTCFinal

 டெம்பா பவுமாவின் சாதனை !

உலகின் எந்தவொரு டெஸ்ட் தலைவருக்கும் இல்லாத சாதனை !

லோர்ட்ஸ், லண்டன்: தென்னாப்பிரிக்க விளையாட்டின் வரலாற்றில் மிகச் சிறந்த தலைவர்களில் ஒருவராக, டெம்பா பவுமா  தன்னை நிலைநிறுத்திக் கொண்டார். உலக டெஸ்ட் சாம்பியன்ஷிப் 2025 இறுதிப் போட்டியில் ஆஸ்திரேலியாவை வீழ்த்தி, தனது நாட்டிற்கு முதலாவது  ஐசிசி பட்டத்தை வென்றதன் மூலம், அவர் ஒரு புதிய சகாப்தத்தைத் தொடங்கியுள்ளார். எந்தவொரு தென்னாப்பிரிக்கத் தலைவரும் செய்யாத சாதனையை அவர் படைத்ததுடன், டெஸ்ட் கிரிக்கெட் வரலாற்றில் எந்தவொரு நாட்டுத் தலைவரும் அடையாத ஒரு வரலாற்றுச் சாதனையையும் படைத்து, சாதனைகளின் உச்சம் தொட்ட தலைவர்களின் பட்டியலில் இடம்பிடித்துள்ளார்.

பவுமாவின் அபாரமான தலைமைப் பதிவு: டெஸ்ட் கிரிக்கெட்டின் புதிய மைல்கல்!

டெம்பா பவுமா, தனது முதல் 10 டெஸ்ட் போட்டிகளில் தலைவராக, 9 வெற்றிகள் மற்றும் 1 சமநிலையுடன், ஒரு தோல்வியையும் சந்திக்காமல் ஒரு வரலாற்றுச் சாதனையைப் படைத்துள்ளார். இந்த 9 வெற்றிகள் மற்றும் ஒரு சமநிலை என்ற சாதனை, டெஸ்ட் கிரிக்கெட் வரலாற்றில் முதல் 10 போட்டிகளில் மிகவும் வெற்றிகரமான தலைவர் என்ற பெருமையை அவருக்குப் பெற்றுத் தந்துள்ளது. 1926 இல் இங்கிலாந்து தலைவராகப் பொறுப்பேற்ற பேர்சி சப்மனின் ஒரு நூற்றாண்டு கால சாதனையை பவுமா முறியடித்துள்ளார். சப்மன் தனது முதல் 10 போட்டிகளில் 9 வெற்றிகளைப் பெற்றிருந்தாலும், ஒரு தோல்வியையும் சந்தித்திருந்தார்.

தென்னாப்பிரிக்க தலைவரின் இந்த அபாரமான ஓட்டம், அனைத்து சந்தேகங்களையும் தகர்த்தெறிந்து, தெ.ஆ அணிக்கு ஒரு உண்மையான வரலாற்றுச் சாதனையைச் சாத்தியமாக்கியுள்ளது. அவரது அற்புதமான வெற்றிப் பயணம் மட்டுமல்லாமல், ஒரு ஐசிசி தொடரில் வலுவான ஆஸ்திரேலியாவை வீழ்த்தி, பல ஆண்டுகளாக அணி மீது படிந்திருந்த 'சோக்கர்கள்' என்ற கறையை நீக்கியதன் மூலம் பவுமா வரலாற்றுப் பக்கங்களில் இடம்பிடித்துள்ளார்.

கோலி, தோனி சாதனைகளையும் தாண்டிய பவுமா!

பவுமா, அவுஸ்திரேலியாவின் ரிக்கி பொண்டிங்கையும் மிஞ்சிவிட்டார். மிக நவீன காலத் தலைவரான ரிக்கி பொண்டிங், தனது முதல் 10 டெஸ்ட் போட்டிகளில் 8 வெற்றிகள், ஒரு டிரா மற்றும் ஒரு தோல்வியைப் பதிவு செய்திருந்தார். பாண்டிங்கின் இந்தச் சாதனை, உலகிலேயே மிகவும் வலுவான மற்றும் ஆதிக்கம் செலுத்திய டெஸ்ட் அணியுடன் பெறப்பட்டது. ஆனால், பவுமா 2023 இன் பிற்பகுதியில் எந்தப் பெரிய சிறப்பையும் பெறாத, இன்னும் வளர்ச்சிப் பாதையில் இருந்த ஒரு தென்னாப்பிரிக்க அணியைப் பொறுப்பேற்று, கிரிக்கெட் வரலாற்றில் என்றென்றும் நினைவுகூரப்படும் ஒரு வெற்றிப் பொறியாக மாற்றியுள்ளார்.

இந்தியாவின் தலைசிறந்த தலைவர்களான விராட் கோலி மற்றும் எம்.எஸ். தோனியின் சாதனைகளையும் பவுமா முறியடித்துள்ளார். விராட் கோலி தனது ஆரம்ப கால டெஸ்ட் தலைமைப் பதவியில் 6 வெற்றிகள், 3 சமநிலை மற்றும் ஒரு தோல்வியைப் மட்டுமே பதிவு செய்திருந்தார். எம்.எஸ். தோனி தனது முதல் 10 போட்டிகளில் தோல்வியடையாமல் இருந்தாலும், அது 5 வெற்றிகள் மற்றும் 5 வெற்றி தோல்வியற்ற போட்டிகளுடன் அமைந்தது.

லோர்ட்ஸில் சரித்திரபூர்வ வெற்றி: பவுமாவின் உறுதி!

லோர்ட்ஸில் நடந்த இறுதிப் போட்டியில் அவுஸ்திரேலியாவை 5 விக்கெட் வித்தியாசத்தில் வீழ்த்திய தென்னாப்பிரிக்காவின் வெற்றிக்கு, எய்டன் மார்க்ரமின் 136 ஓட்டங்கள் மட்டுமல்லாமல், பவுமாவின் உறுதியான மற்றும் துணிச்சலான 66 ஓட்டங்களும் முக்கியப் பங்காற்றின. தொடைத்தசைப் பிடிப்பு மற்றும் வெளிப்படையான வலியுடன் துடுப்பாடிய போதிலும், பவுமா முன்நின்று வழிநடத்தினார். தனது அணி நீண்டகால மனத்தடையை நீக்கி, தென்னாப்பிரிக்க கிரிக்கெட்டில் ஒரு குறிப்பிடத்தக்க மைல்கல்லை எட்ட வழிவகுத்தார். இது தென்னாப்பிரிக்க கிரிக்கெட்டில் ஒரு பொற்காலத்தின் தொடக்கமாக அமையலாம்.

#டெம்பாபவுமா #WTCFinal #கிரிக்கெட்தலைவர் #தென்னாப்பிரிக்ககிரிக்கெட் #வரலாற்றுவெற்றி #சோக்கர்கள்இல்லாமே #TeamSouthAfrica