ஷிரேயாஸ் ஐயரின் எழுச்சி: இந்திய அணியின் எதிர்காலத் தலைமைப் போட்டியில் ஒரு புதிய அத்தியாயம்!

கிரிக்கெட் உலகில் தலைசிறந்த தலைவர்கள் உருவாகும் கதை, எப்போதும் பரபரப்பானது. 

தற்போது இந்திய அணியின் எதிர்கால தலைமைப் போட்டியில் ஒரு புதிய அத்தியாயம் தொடங்கி உள்ளது. 

ஷிரேயாஸ் ஐயரின் எழுச்சி: இந்திய அணியின் எதிர்காலத் தலைமைப் போட்டியில் ஒரு புதிய அத்தியாயம்!

மும்பை: இந்தியன் பிரீமியர் லீக் (ஐபிஎல்) 2025 சீசன் முடிவடைந்த நிலையில், பல அதிரடி ஆட்டக்காரர்களைக் கண்டது. இந்த சீசனில் தனித்துத் தெரிந்து, தனது தலைமைப் பண்பால் அனைவரையும் திரும்பிப் பார்க்க வைத்த ஒரு வீரர் என்றால் அது ஷிரேயாஸ் ஐயர்தான் !

பஞ்சாப் கிங்ஸ் அணியை வழிநடத்திய அவர்,  பஞ்சாப் கிங்ஸ் வரலாற்றில் 2014ஆம் ஆண்டுக்குப் பிறகு முதல் முறையாக இறுதிப் போட்டிக்கு அழைத்துச் சென்றார். இருப்பினும், இறுதிப் போட்டியில் றோயல் சேலஞ்சர்ஸ் பெங்களூருவிடம் ஆறு ஓட்டங்கள் வித்தியாசத்தில் தோல்வியைத் தழுவினாலும், ஐயரின் தலைமைப் பண்பு இந்திய கிரிக்கெட் வட்டாரத்தில் பெரும் தாக்கத்தை ஏற்படுத்தியுள்ளது.

ஐயரின் அசாதாரண ஆட்டமும் தலைமைப் பண்பும்

இந்த ஐபிஎல் சீசனில், ஷிரேயாஸ் ஐயர் பஞ்சாப் கிங்ஸ் அணிக்காக 17 போட்டிகளில் 604 ஓட்டங்கள் குவித்து அதிக ஓட்டங்கள் எடுத்த வீரராகத் திகழ்ந்தார். இதில் ஆறு அரைச் சதங்கள் அடங்கும். குறிப்பாக, குவாலிஃபையர் 1 போட்டியில் மும்பை இந்தியன்ஸுக்கு எதிராக அவர் தனி ஒருவராக நின்று எடுத்த 87 ஓட்டங்கள்* (ஆட்டமிழக்காமல்) நீண்ட காலத்துக்குப் பேசப்படும். கிட்டத்தட்ட தனி ஆளாகவே அணியை வெற்றிப் பாதைக்கு அழைத்துச் சென்ற அந்தப் போட்டி, ஐயரின் அழுத்தத்தைச் சமாளிக்கும் திறனையும், அதிரடியான ஆட்டத்தையும் வெளிப்படுத்தியது.

இந்திய கிரிக்கெட்டின் செல்வாக்கு மிக்க முடிவெடுக்கும் நபர்களில் ஒருவர், "ஐபிஎல் 2025-இன் மிகப்பெரிய அடையாளங்களில் ஒன்று - ஷிரேயாஸ் ஐயரின் தலைமைப் பண்புதான்" என்று இந்தியன் எக்ஸ்பிரஸ் நாளிதழுக்குத் தெரிவித்துள்ளார். "தற்போது அவர் ஒருநாள் போட்டிகளில் மட்டுமே விளையாடி வருகிறார். ஆனால், இந்த ஐபிஎல் தொடருக்குப் பிறகு அவரை T20 சர்வதேசப் போட்டிகளிலிருந்தோ அல்லது டெஸ்ட் போட்டிகளிலிருந்தோ வெளியே வைத்திருக்க முடியாது. அதோடு, அவர் இப்போது அதிகாரப்பூர்வமாக வெள்ளைப் பந்து கிரிக்கெட் தலைமைத்துவத்துக்கான போட்டியில் இணைந்துள்ளார்," என்றும் அந்த அதிகாரி கூறியிருக்கிறார்.

தலைமைப் போட்டி: மற்ற முக்கிய வீரர்கள் யார்?

தற்போது இந்திய ஒருநாள் அணிக்கு ரோஹித் சர்மாவும், T20 அணிக்கு சூர்யகுமார் யாதவ்வும் தலைவர்களாக உள்ளனர். ஆனால், ஐயரின் சமீபத்திய தலைமைப் பண்பு, எதிர்காலத் தலைமைக்கான ஒரு புதிய விவாதத்தைத் தூண்டிவிட்டுள்ளது.

ஷிரேயாஸ் ஐயரின் தனித்துவமான தலைமைப் பண்பு, முன்னாள் இந்தியத் தலைவர்களான மகேந்திர சிங் தோனி மற்றும் ரோஹித் சர்மாவுக்குப் பிறகு,  கடந்த ஐந்து ஆண்டுகளில் மூன்று இறுதிப் போட்டிகளுக்கு வழிநடத்திய மூன்றாவது தலைவர் என்ற சாதனையைப் படைத்துள்ளார். அதேபோல ஷிரேயாஸ் ஐயர் மூன்று வெவ்வேறு ஐபிஎல் அணிகளை இறுதிப்போட்டிக்கு அழைத்துச் சென்றிருக்கிறார். இது ஒரு வீரரின் அசாதாரணமான தலைமைத் திறனைக் காட்டுகிறது. இந்தப் பருவம் முழுவதும் அவரது அணியை சிறப்பாகக் கையாண்ட விதம், அவரது முதிர்ச்சியையும், களத்தில் உள்ள சவால்களைக் கையாளும் அவரது திறனையும் வெளிப்படுத்தியது.

ஐயரின் இந்தத் திறமைகளை, பஞ்சாப் கிங்ஸ் அணியின் பயிற்சியாளர் ரிக்கி பொண்டிங் வெகுவாகப் பாராட்டியுள்ளார். இங்கிலாந்துக்கு எதிரான இந்திய டெஸ்ட் அணியில் ஐயர் இடம்பெறாதது குறித்துப் பொண்டிங், "நான் மிகவும் வருத்தப்பட்டேன்... ஆனால் அவர் அதை நன்றாக ஏற்றுக்கொண்டு முன்னேறிவிட்டார். எங்களுக்காக அவர் விளையாடும் ஒவ்வொரு முறையும் சிறப்பாகச் செயல்பட வேண்டும் என்ற உண்மையான பசி அவரது கண்களில் தெரிகிறது. போட்டிகளை வெல்ல வேண்டும், சிறந்த தலைவராகத் தன்னை வளர்த்துக் கொள்ள வேண்டும் என்ற ஆர்வம் அவரிடம் உள்ளது" என்று கூறியிருக்கிறார்.

ஐயரைப் போலவே, இந்திய அணிக்கு தற்போது ஹர்திக் பாண்டியா (T20 மற்றும் ஒருநாள் போட்டிகளில் தலைமைப் பண்பு அனுபவம்), ஜஸ்பிரித் பும்ரா (டெஸ்ட் போட்டிகளில் தலைவராகச் செயல்பட்டவர்) போன்றவர்களும் தலைமைப் போட்டியில் உள்ளனர். ஐயரின் இந்த எழுச்சி, இந்திய கிரிக்கெட்டின் எதிர்காலத் தலைமைப் போட்டியை மேலும் விறுவிறுப்பாக்கியுள்ளது. சுப்மன் கில் இங்கிலாந்துக்கு எதிரான டெஸ்ட் தொடரில் தலைவராகச் செயல்படவுள்ள நிலையில், ஐயரின் தலைமைப் பண்பும், அவரது தொடர்ச்சியான திறனும் இந்திய கிரிக்கெட்டின் எதிர்காலத்தை வடிவமைப்பதில் முக்கிய பங்கு வகிக்கும் என்பதில் சந்தேகமில்லை.